Bənzər yazılar
Müstəqil siyasət aparan ölkələr Ağ Ev üçün qəbuledilməzdir - DEPUTAT
6-12-2023, 16:00
ABŞ yaxşı bilir ki, Azərbaycanla şantaj, diktə dili ilə danışmaq heç bir nəticə verməyəcək
"Son günlər ABŞ ölkəmizə qarşı açıq şəkildə qərəzli mövqe sərgiləməkdən çəkinmir. Hətta Konqres 907-ci əlavənin yenidən hüquqi qüvvəsinin təmin edilməsi qərarını verib. Bu, təcavüzkar Ermənistanın mövqelərinin dəstəklənməsi, eyni zamanda onu ölkəmizə qarşı revanşa həvəsləndirmək cəhdləri kimi qiymətləndirilməlidir".
Bu sözləri "Azərbaycan" qəzetinə açıqlamasında Milli Məclisin deputatı Elşad Mirbəşiroğlu deyib. Deputat bildirib ki, ABŞ ötən əsrin 90-cı illərinin əvvəllərində də Ermənistana tam dəstək verərək 907-ci əlavəni qəbul edərək onu Azərbaycan torpaqlarını işğala daha da həvəsləndirdi. 907-ci əlavə qəbul olunan zaman Ermənistan Azərbaycan torpaqlarını sistemli şəkildə işğal edirdi və xalqımıza qarşı soyqırımı həyata keçirirdi. Bütün bunların fonunda ABŞ-nin Ermənistana dəstək verməsi bütövlükdə region üçün çox ciddi təhlükə yaradırdı. Çünki Ermənistan müstəqil siyasət yürütmək imkanlarına malik deyil.
"Bu, nə üçün təhlükəlidir? Ermənistanın Azərbaycana qarşı ərazi iddiaları var və bu iddialarından çəkilmək fikrində olmadığını nümayiş etdirir. Ermənistanın ABŞ-nin maraqlarına xidmət etməsi müqabilində isə bu ölkə heç bir ədalət prinsipini gözləmədən onu dəstəkləyir. Ermənistan Azərbaycana qarşı ərazi iddiaları ilə çıxış edir, torpaqlarımızı uzun illər işğal altında saxlayıb. Belə olan halda ABŞ-nin Ermənistana dəstək verməsi təbii ki, həm Azərbaycan, həm də bütövlükdə region üçün çox təhlükəlidir", - deyə E.Mirbəşiroğlu deyib.
Deputat vurğulayıb ki, Vaşinqton Ermənistan vasitəsilə Cənubi Qafqaz regionunda Rusiyaya qarşı ikinci cəbhə açmağa çalışır. Bu, bütün region dövlətləri üçün təhlükəlidir. ABŞ Cənubi Qafqazda Azərbaycan kimi güclü, təsirli bir dövlətlə münasibətlərini qoruyub saxlamaqda maraqlı olmalıdır. Ermənistan hər mənada zəif dövlətdir. Amerika üçün Ermənistanın cəlbediciliyi ondan ibarətdir ki, orada tam Qərbyönümlü rejim yarada biliblər və bu rejim də Qərbdən gələn təlimatlar əsasında davranır. Bu baxımdan Amerikanın Cənubi Qafqaz regionu ilə bağlı yeganə ümid yeri Ermənistandır.
Azərbaycanın tam müstəqil siyasət yürütdüyünü və milli maraqları çərçivəsində davrandığını qeyd edən deputat bildirib ki, ABŞ bir qayda olaraq belə halları qəbul etmir: "Yəni suveren davranan, müstəqil siyasət yürüdən ölkələr Ağ Ev üçün bir növ qəbuledilməzdir. Belə olan halda ABŞ qeyri-obyektiv yanaşma tətbiq edir. Birmənalı şəkildə Ermənistanı dəstəkləyir, amma bu həm Amerikanın, həm də Avropanın maraqlarına zərbə vura bilər. Çünki Azərbaycan Avropanın enerji təhlükəsizliyinin təmin olunmasında əlahiddə rol oynayan bir dövlətdir. Ayrıca olaraq Qafqaz regionunda həyata keçirilən logistika layihələrinin mərkəzində dayanmaqdadır ki, bu da Avropanın istehlak bazarlarının təchizatında çox mühüm rol oynayır".
ABŞ Dövlət katibi Entoni Blinkenin Prezident İlham Əliyevlə telefon danışığını xatırladan deputat bildirib ki, ABŞ qarşısında tam müstəqil siyasət yürüdən Azərbaycan olduğunu, onunla şantaj, diktə dili ilə danışmağın heç bir nəticə verməyəcəyini dərk etdi.
Deputat hesab edir ki, E.Blinkenin Prezident İlham Əliyevin irəli sürdüyü şərtləri qəbul etməsi ABŞ-nin yanlış davrandığının fərqində olduğunu göstərir. Amerika Azərbaycana təzyiq etməyə çalışsa da, bunun heç bir nəticə vermədiyini görərək ritorikasını dəyişmək məcburiyyətində qaldı.
Əsmər QARDAŞXANOVA,
"Azərbaycan"
Facebook'da Paylaş
